20 urte baino gehiago daramatzagu gure kooperatibetan euskara planak sustatzen, gure bazkide-langileek euskaraz lan egiteko aukera izan dezaten.

Gure bazkide-langileak Garapen Iraunkorrerako Helburuetan inplikatzeko dinamikak eta ekimenak sustatzen ditugu. Horien artean daude elkartasun kanpainak, gizarte eragileekin elkarlan dinamikak, boluntariotza lanak…

Mugikortasun planen bitartez lanerako mugikortasun iraunkorra sustatzen dugu, besteren artean, bizikletaren erabilera, garraio publikoa eta auto partekatua bultzatuz.

Ezagutu fagor Mugi

Debagoiena 2030 iraunkortasun sarearen baitan, eragile publiko eta komunitarioekin dihardugu lankidetzan, gure eskualdearen iraunkortasunerako trantsizioa sustatuz. Debagoiena 2030eko organo eta dinamiketan aktiboki parte hartzeaz gain, diruz laguntzen ditugu bertatik sortzen diren proiektu ezberdinak.

Ezagutu Debagoiena 2030

Gizabidea Fundazioaren bitartez eskualdeko hezkuntza eragile kooperatiboekin dihardugu lankidetzan, eskualdean kalitatezko hezkuntza eskaintza baterako beharrezko diren azpiegituren garapenean lagunduz. Gaur-gaurkoz, Debagoieneko zenbait hezkuntza eragilek darabilten hemezortzi eraikin eta guneren jabe da Gizabidea Fundazioa.

Ezagutu Gizabidea Fundazioa

Taldeko kooperatibak dauden herrietan diharduten askotariko elkarteak diruz laguntzera bideratzen da gure Gizarte Funtsaren zati bat.

Mundukide Fundazioaren bitartez, garapen bidean dauden herrialdeen garapen komunitarioa sustatzen dugu, kooperatibagintzan daukagun esperientzia bertako komunitateekin partekatuz. Besteren artean, Mozambikeko, Kolonbiako, Etiopiako, Ekuadorko eta Brasilgo egitasmoekin dabil Mundukide Fundazioa.

Ezagutu Mundukide Fundazioa

Garabide elkartearen bitartez, hizkuntza gutxituen berreskurapen prozesuan dauden komunitateekin partekatzen dugu euskararen normalizazioan daukagun esperientzia. Garabide, hamaika hizkuntza komunitaterekin dabil elkarlanean. Horien artean dira aimara, maputxea, kurdua, amazigha, kaqchikela, Yukatango maia…

Ezagutu Garabide Elkartea