Haren ekoizpen prozesuetan sorturiko hondar-hondakinen balizko barne erabilerak aztertzen dabil Fagor Ederlan kooperatiba, Betsaide eta Metal Smelting burdin galdategiekin batera, Hicore egitasmoaren baitan. Azterlan teknologia-zentroaren eta EAEko zein Nafarroako Galdeketa Elkartearen babesa du ekinbideak. Hain zuzen ere, gaur-gaurkoz hondakin den hondarraren berreskuratzerako teknologia eta prozesu eraginkorrenen bila jardungo du Hicorek datozen hiru urteetan. Behinik behin, barne erabilerara bideratuko litzateke hondar-hondakina.
Iraunkortasunaz mintzo, proiektu estrategikoa da Hicore, galdategien jarduera iraunkorrago bilakatu guran baitabil ekinbide berria. Besteren artean, ekonomia zirkularra eta errekurtsoak ahalik eta kostu txikienean aprobetxatzea lituzke jomugan. Eta, horrek, hondar-hondakinak balorizatu beharra lekarke, ostean prozesuetan erabili ahal izateko -hasiera batean, arrak ekoiztera bideratuko litzateke berreskuraturikoa, beti ere, ekoizturiko burdinezko piezen kalitate-estandarrak mantenduta-.
Ostera, hondar zirkuituaren analisi xehatua ere badu aurreikusirik egitasmoak, hainbaten artean, gaur egun erabiltzen den hondar berria beharrean, berreskuraturikoa erabiltzen bada, moldeen ekoizpenerako hondar berdeek denboran dituzten balizko eraginak ezagutzeko.
2024. urtean, proiektua bukatutakoan, haren parte diren galdategien ezaugarrietara egokien moldatzen diren soluzioen bideragarritasuna aztertu ostean, balizko ezarpen ereduak landuko lituzke partzuergoak. Behinik behin, prozesu hori, galdetegietan edo espreski horretara bideraturiko instalazio espezializatu batzuetan litzateke gauzagarri.
